NGEMPU

Kenken carane ngempu, apang nyak panake degeng?

Megending-gending, keto kone carane.

Sambilang gendang-gending, ayun-ayunang panake, sing kerasa dapetang ia suba pules leplep.

Tis pulesne.

Mekenyem bibihne cara ada bidadari nyandenin. Mirib saja widyadarine rauh ngusap-ngusap jitne.

Mirib saja ulian megending-gending telah megedi soroh aeng ane demen ngulgul anak cenik peteng-peteng.

Yen sing saja keto, nak anggona gena pekak, dadonge liu nyepel gendingan rare.

Uli gendingan bibi anu nganti gendingan anung-anung simpena beten galengne.

Uli kidung rumakseng wengi nganti gendingan hana kidung pejanga di kolongan pintune.

Keto masih gendingan sekar alit muah sekar ane alitan jeg seletanga lontarne di selagan basang bedege.

Yen cucune ngeling peteng-peteng, pesuanga sesepelane sekabesik, jeg gendang-gending, apa kaden ane maksudanga.

Suba suud cucune ngeling, suud masih ia megending, jeg pragat aji gending dogen.

Pengenahne saja aluh.

Sing masih tawang, apa saja aluh yen jalanin.

Sing cenik dogen kone empuanga. Iba pedidi masih perlu empuang, nyen konkon ngempuang iba yen mula sing iba pedidi.

Ngempu iba pedidi sukehan kone teken ngempu nak cenik.

Nak cenik nawang apa ane kenehanga. Tungkalikane, anak tua liu tusing bisa memaca kenehne pedidi.

Mekejang penampen kenehne ane nyaplir, benehange teken ibane pedidi.

Kenkenang ngempu awak yen ukudane tonden palas ajak wisayan kenehe pedidi.

Kenehe kadena lantas patuh teken ibane. Ibane kadena patuh teken kenehne, pragat bingung pedidi.

Nyen ngempu nyen?

Apa awakne ngempuang keneh, apa kenehne ngempuang awakne.

Salingan lakar bisa memaca isin keneh, isin kenehne pedidi dogen tusing taen kebit-kebitanva.

Mula paling sukeh kone yen ngempu keneh.

Apa anggin ngempuang keneh?

Yen pekak, dadonge takonin, masih pesautne patuh, jeg megending!

Jani liu anak dueg megending, kewala gendingne len-len.

Gendingan beneh-beneh buin benehanga, nganti sing kena ban ngadanin, encen gendingan beneh, encen gendingan ane beneh-benehanga.

Ana anak gendang-gending ngorahang ibane  nungkhlang keneh, apa kaden adan tembangne.

Buin griyang griyeng cara tamulilingan sedeng ngisep sari, buin cara munyin yeh suluk di grojogane, buin mekuus cara munyin ujan angin uli joh.

Campuh dingeh di kupinge, sing pedas tawang, apa ia megending, apa ia ngeling, apa ia memantra, apa ia ngedekin ibane pedidi.

Yen takonin sing len pesautne, ia ngorahang awakne ngempuang keneh pedidi.

Nyak gending, nyak ngeling, nyak mantra, jeg patuhanga.

Pada-pada kone ento ngejerang akasane, lakar aas kone sekancan ane neket di kenehne, tis kone pulesne.

Melah kone ipiane, seger kone bangun semeng-semengan, enak kone rasan yeh kamar mandine, angkihane kerasayang ingan, enceh parus, penyakit anyud, ulian megendang-gending kone.

Ada buin nyamane ane sing bisa megending, mekita ia milu-milu gejeranga buka ukud, masak sing lakar megejeran akasane di tengahan ukudan iragane.

Keto abetne matutang iba, anggep dogen awakne ene cara punyan kayu, yen terus gejerang, sinah lakar aas soroh ane neket-neket.

Keto logikan ipune.

Awinan sebilang sanja ia ngejerang awakne buka ukud di arepan umahne, liu anake mebalih, kewala sing ada ane ngerti, anak nguda kone ento.

Buin megejeran awakne, buin ngeliling di tanahe, buin bangun, buin bah, persis cara pocong punyah kena setrum.

Aget leluhurne sing mebalih uli si sanggar kemulane.

Rahayu.