Ngidih Teken Awak

Yen prade suba telah sajan uleh-ulehane, kema mai sing maan nyilih, sing maan ngidih, kija laku?

Awake pedidi idihin.

Keto pesaut shastrane.

Munyin shastra mula dingeh aluh, kewala sing gampang ban ngeresepang. 

Awake ane ngidih, awake ane idihin.

Munyi apa adane ento?

Luung dingeh di kuping, kewala mebresetan cara benang susut yen pineh-pinihin, dija kaden tongos bongkolne, sing tepuk dija kaden muncukne.

Yen duluh sing neked-neked ditu.

Awake ngidih, awake idihin!

Oranga cara munyi sing dadi anggon, mirib ulian tusing bisa nganggon, kewala yen suba saja telah uleh-ulehane, nguda sing awake enyak nyobakang ngidih teken awak pedidi.

Pelajahin kenken carane ngidih teken awak pedidi.

Kewala apang seken-sekenang pelajahin, apang bisa ngidih seken-seken mesekenan.

Dewa ane paling bares mula diawake kone tongosne.

Sing makatang lemahne, petengne dadi Dewane ento tunasin, di pulese masih Ida dadi tunasin. 

Dewa ane ada di awake ento kone.

Dewa paling bares di seluruh dunia.

Paling bares di sekancan para Dewa.

Paling welas asih.

Goban Dewane ento sing beda teken goban awake.

Pelajahin malu memaca apang seken-seken bisa maca.

Yen suba bisa memaca, mara lantas kebit-kebitang shastran Pekak Dadonge, di shastran pekak dadonge liu ada bacaan soroh Dewa. Uli Dewa Bagus bganti Dewa Bocok kone ade ditu. Uli Dewa Muani, Dewa Luh, nganti Dewa Bancih ada ditu

Depin awake buin ngerunguang bagus-bocok, utawi luh-muani-bancih. Bisa paling awake nyanan, tangenang kupinge, dingehang ucap Dewa-Dewane ento.

Yen ada Dewa ngucap ragan Idane "Aku", ento suba dewa di dewek. Liu ada Dewa ragan Idane "Aku". Untengne, liu ada Dewa di dewek, mekejang Dewane ento dadi tunasin, kewala ada besi ane paling paek teken awake.

Upamine, yen Sanghyang Pashupati Phat Shastra mucap, "Aku Hyang Ning!. Aku Hyang Njng!". Ida suba ento Dewa di dewek.

Ida meperagayan Ning.

Nganti ping pindo Ida ngucap ragan Idane Hyang Ning, sinah Ida Dewa di dewek meraga Ning.

Ida dadi tunasin.

Ento madan ngidih teken awak.

Ento madan awak ngidih, awake idihin, kewala sing dadi ngidih-ngidih teken Dewa.

Dewa sing demen teken gegendong.

Uleh-ulehang malu pedidi di sisi, yen prade telah sajan uleh-ulehane, mara ditu lantas nunas.

Sing dadi mekejang tunas, apabuin ngawag-ngawag.

Sira Sanghyang Pashupati Phat Shastra punika?

Keto petakon awake mekita nawang.

Sing luung kone rasane ngidih yen tonden tawang yen ane lakar idihin. Mula awake dueg ngalih pematut, anggon matutang apa ane edotang.

Yen awake metakon teken tiang, sing tiang nawang sira kaen Ida sujatine. Melah yen awake langsung metakon teken Ida.

Dingehang wacanan Ida, duk Ida meucap-ucap ring selagan shastrane. Kene silih sinunggil wecanan Ida, atugel duang tugel ane enu bakat ingetang.

"Malingga aku Sanghyang Pashupati Phat Shastra".

Ida kocap merupa Lingga di awak.

Depin malu awake metakon apa madan Lingga di awak. Dingehang buin wecanan Ida selanturne.

"Aku guru ning shastra kabeh!. Aku Dewa ning watek Nawa Sangha , watek para Resi kabeh. Aku luhur tan keluhuran. Aku shakti.  Aku wenang"

Buka keto Ida mewecana.

Kenken daging wacanan Ida, keto kesujatian Idane. Sanghyang Pashupati Phat Shastra sing taen nguluk-nguluk.

Kenken, payu lakar ngidih teken awak, disubane tawang nyen ane lakar idihin?

Liu enu soroh Dewa ane ada di tengahan awake, ane dadi tunasin yen prade suba telah sajan uleh-ulehane, kewala uleh-ulehang malu pedidi, di tengah utawi di sisi, sing ada ngidih aji aluh.

Rahayu.